939. Ghirigori - 恆星畫符仔 ft. 阿錕 (20230812)

<p>Kā 夜空當做 畫布，tī 面頂畫圖 是足好耍 ê 代誌。你會當用一款有創意 ê 攝影技術，就是 tī 翕相 leh 感光 ê 時陣，小可仔出力敲望遠鏡，按呢就會予恆星 ê 光點 tī 數位影像看起來敢若 leh 跳舞。這个結果會出現一條恆星畫 ê 海湧線（若是雙星畫 ê 就是兩條海湧線），而且閣會當看出恆星是啥物色。這張藝術拼鬥圖有翕著 北天星座 牧夫座、北冕座、蛇夫座、kah 后鬃座 ê 恆星 畫出來 ê 彩色線，這就叫做 Ghirigori。遮有 25 粒恆星畫出無仝款多彩 ê 海湧線，in 是佗一粒星，有標 tī 圖 ê 邊界。是講，恆星是啥物色，kah 伊 ê 溫度有關係。白色 ê 恆星 kah 咱太陽 ê 溫度差不多，藍色恆星 ê 溫度較懸，黃色 kah 紅色恆星 ê 溫度是 比太陽 較低。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230812/ <br />影像：Paolo Palma <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap230812.html</p> <br /> <br/>Powered by <a href="https://firstory.me">Firstory Hosting</a>