896. MAVEN 翕--ê 火星紫外光影像 ft. 阿錕 (20230627)

<p>這 2 張火星全球影像 是 紫外光波段翕 ê，是超過人類目睭看會著 ê 光譜範圍。倒爿彼張相片 kah 正爿彼張相片，分別是 MAVEN 太空船 用 紫外光影像光譜儀 tī 2022 年 7 月 kah 2023 年 1 月 ê 時陣翕--ê。相片有目睭看袂著 ê 3 段紫外光波段，包括紅色、青色、kah 藍色。咖啡色 kah 青色是用來表示這粒 紅色行星 ê 表面特徵。雲霧是白色 kah 藍色，毋過懸海拔 ê 臭氧層是足媠 ê 茄仔色。倒爿彼粒火星，下底足白 ê 部份是南極 ê 冰帽仔，毋過 tī 南半球 熱天 ê 時陣會變閣較細頂。正爿彼粒火星，頂懸北半球 ê 極區，是藏 tī 雲 kah 大氣臭氧層下底。火星大氣佮揮發物演化任務太空船 MAVEN ùi 2014 年就開始 leh 探索火星薄薄 ê 頂層大氣、電離層，閣有伊 kah 太陽、太陽風是按怎產生交互作用--ê。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230627/ <br />影像：MAVEN, Laboratory for Atmospheric and Space Physics, Univ. Colorado, NASA <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap230627.html</p> <br /> <br/>Powered by <a href="https://firstory.me">Firstory Hosting</a>