840. Tī 青苔頂懸 ê 水熊蟲 ft. 阿綠 (20230521)

<p>這敢是外星人？可能毋是，毋過 tī 地球頂懸所有 ê 生物內底，水熊蟲 可能是上倚外星人--ê。這是因為咱知影講，水熊蟲 就算是無食無啉幾若十冬，嘛猶活會落去。In tī 溫度 giōng 欲 絕對零度 到 水沸點以上 ê 範圍會當活咧，tī 氣壓 0 以上 到 比 海底 壓力閣較懸 ê 範圍會當活咧，直接 tī 危險 ê 輻射 下底嘛活會落去。這寡 極端生物 ê 生存適應能力是遮爾強，這捌 tī 2011 年 踅地球 ê 太空船外口 試驗過。水熊蟲 會遮爾耐操，一部份是因為 in 有法度修復 in 家己 ê DNA，而且 in kā in 身軀內底 ê 水 減到賰幾葩 嘛猶會擋。有一寡 微型水熊蟲 差一點仔就變做外星生物矣。Tī 2011 年 ê 時陣，in 按算欲坐火箭到火星 ê 衛星 火衛一 Phobos ，到 2021 年才送轉來到月球。毋過 2011 年 ê 發射 煞失敗，2021 年 ê 登陸 摔歹去矣。Tī 地球大部分 ê 所在，水熊蟲 是比 人類 閣較普遍。這張 加強色彩 ê 電子顯微鏡相片 內底，有一隻 毫米長 ê 水熊蟲 tī 青苔 頂懸咧爬。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230521/ <br />影像：Nicole Ottawa &amp; Oliver Meckes / Eye of Science / Science Source Images <br />音樂：P!SCO - 鼎鼎 <br />聲優：阿綠 <br />翻譯：An-Li Tsai (NCU) <br />原文：https://apod.nasa.gov/apod/ap230521.html</p> <br /> <br/>Powered by <a href="https://firstory.me">Firstory Hosting</a>