756. Messier 10 kah 彗星 ft. 阿綠 (20220721)

<p>Tī 2022 年 7 月 15 翕--ê 彗星 C/2017 K2 (PanSTARRS)，誠拄好去 拄著 Messier 天體，球形星團 Messier 10，in 就做伙出現 tī 這張闊幅望遠鏡景色內底。M10 是 18 世紀一个專門揣彗星 ê 專家 Charles Messier 揣著 ê 第十粒毋是彗星 ê 天體。M10 差不多離咱有 1 萬 4000 光年遠。PanSTARRS 彗星 tī 7 月 14 這工 行到離咱上倚 ê 所在，這當陣伊 kah 咱美麗地球 ê 距離干焦 15 光秒遠爾爾。C/2017 K2 這粒彗星 ê 彗鬚 kah 彗尾 予 21 世紀 ê 彗星觀星者看甲有夠滿意。伊應該猶是 咱用細台天文望遠鏡 就會當踮 北天熱天 ê 夜空 看著 ê 彗星。這粒 PanSTARRS 彗星是頭一擺 ùi 太陽系遠方 ê Oort 雲 遐飛過來--ê。伊是 tī 2017 年 5 月飛過土星軌道彼陣，予咱發現--ê。伊是彼陣咱所知影 來到太陽系內部 ê 彗星內底，上遠閣活動力上強 ê 彗星。伊 tī 12 月 19 彼工離咱 ê 太陽上倚，彼陣伊 kah 太陽 ê 距離是 1.8 天文單位，比火星軌道閣較遠。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220721/ <br />影像：German Penelas Perez <br />音樂：P!SCO - 鼎鼎 <br />聲優：阿綠 <br />翻譯：An-Li Tsai (NCU) <br />原文：https://apod.nasa.gov/apod/ap220721.html</p> <br /> <br/>Powered by <a href="https://firstory.me">Firstory Hosting</a>