720. NGC 6164：龍卵星雲 kah 星雲暈 ft. 阿錕 (20221226)

<p>中央 ê 恆星會當做出所有 ê 物件。這粒星叫做 龍卵，是一粒較罕得看著、高溫、足光 ê O 型星。伊 ê 質量差不多是太陽 ê 40 倍。伊毋但生出這个足複雜 ê 星雲 (NGC 6164) 踅 tī 伊邊仔，嘛生出藍色 ê 星雲暈 kā 伊包起來。伊 ê 名有一部份是 ùi 這張美麗 ê NGC 6188 來--ê，就叫做 戰鬥龍 Ara。閣 3-4 百萬年，這粒大質量恆星應該就會結束伊 ê 性命，變做 超新星爆炸。這个星雲 ê 大細有 4 光年闊，是雙極對稱 ê 結構，予伊看起來較成是一般 ê 行星形星雲，就是氣體 包 tī 欲死 ê 類太陽恆星外口。NGC 6164 kah 其他足濟 行星形星雲 仝款，嘛有一个闊闊 暗暗 ê 星雲暈，就是這張 深空望遠鏡影像 內底藍色 ê 部份。這个藍色星雲暈，應該是 O 型星 tī 早期較活潑 ê 階段 擲--出來 ê 物質。伊落尾會湠到邊仔 ê 星際介質 去。NGC 6164 離咱有 4200 光年 遠，就 tī 南天星座 角尺 ê 星座 (矩尺座) 遐。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20221226/ <br />影像：Russell Croman <br />音樂：高小糕 GaoXiaoGao <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap221226.html</p> <br /> <br/>Powered by <a href="https://firstory.me">Firstory Hosting</a>