713. ZTF 彗星 ê 尾溜 ft. 阿錕 (20230109)

<p>咱可能有機會用目睭直接看著 ZTF 彗星。這粒大質量雪球 sī 舊年初發現--ê。伊這馬 sī 愈來愈光，因為伊離太陽 kah 地球 sī 愈來愈倚矣。彗星 C/2022 E3 (ZTF 彗星) 紲落來這禮拜會行到離太陽上倚 ê 位置。時到伊就會變甲足光--ê，按呢北天 ê 觀星者 tī 好天 ê 暗暝，無雙筒千里鏡嘛看會著。彗星 上歹名聲 ê 代誌 就是，in 若是愈倚太陽，伊 ê 輝度就愈歹預測。這張影像是頂禮拜 tī 這个 美麗 ê 星場 翕--ê。有 3 條藍色 ê 離子尾溜 伸到正爿頂懸，應該是多變 ê 太陽風 予 離子 ùi 堅凍 ê 彗核 噴出來 ê 結果。彗星 ê 白色 塗粉尾溜 就較短，伸 tùi 倒爿頂懸去。青光 是彗核，是 ùi 發光 ê 炭素氣體來--ê。ZTF 彗星 應該會 tī 二月初彼陣行到離地球上倚 ê 位置，了後伊就會雄雄變暗去。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20230109/ <br />影像：Jose Francisco Hernández <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap230109.html</p> <br /> <br/>Powered by <a href="https://firstory.me">Firstory Hosting</a>