577. 銀河星門 ft. 阿錕 (20220817)

<p>天頂有一个足大--ê、用天星做 ê 星門，你一工會經過伊兩擺。這个星門實際上是咱 ê 銀河系，是地球 ê 自轉予你叫是講，你是去 hŏng 捒 tùi 伊下底過--ê。咱 銀河 ê 中央帶 是一條 tī 天頂去 hŏng 搝長--ê、暗暗 ê 光帶，你愛 離開繁華 ê 夜都市，到燈光無閃閃爍 ê 所在，才看會著。毋閣你若是 tī 像這款 烏暗 ê 所在，翕一張 長時間感光 ê 闊幅相片，按呢欲看著銀河 ê 中央盤，就變做是一件真簡單 ê 代誌。這是一張 數位合成相片，是 tī 仝一暗用仝一台 kha-mé-lah 翕幾若張相片才 kā 鬥做一張--ê。因為這是用 立體投影 ê 方式，銀河才會看起來干焦是一个 大型 ê 圓形入口。咱 ê 銀河 就 親像是一个彎弓形 ê 星門。Tī 星門內底彼个較暗 ê 光帶是 黃道光，彼是日光反射 太陽系 內底 ê 塗粉 造成 ê 光。前景是 智利 ê 高原沙漠。遐 ê 地形坎坎坷坷，面頂閣有 仙人掌 kah 焦--去 ê 石頭。遮離 El Sauce 天文台 kah 當咧起 ê Vera Rubin 天文台 袂講蓋遠。是講 Vera Rubin 天文台按算欲 tī 2024 年 開始日常運作。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220817/ <br />影像：Maxime Oudoux <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220817.html</p> <br /> <br/>Powered by <a href="https://firstory.me">Firstory Hosting</a>