540. 航海家 1 號 翕--ê 木衛二 Europa kah 木星 ft. 阿錕 (20220717)

<p>木星頂懸這寡圓點是啥物？中央倚正爿上大--ê，是上大上遠 ê 大紅斑，是一个 tī 木星 頂懸使性地 ê 風暴系統。這个風暴系統，Giovanni Cassini tī 357 冬前 就有注意著。咱這馬猶毋知是按怎 大紅斑是紅色--ê。倒爿下跤這粒，是木星上大粒 ê 月娘：木衛二 Europa。這張是 航海家太空船 tī 1979 年翕--ê。相片支持現代 ê 假說，講，木衛二 Europa 有一个地下海洋，所以遐是一个 揣外星生物 ê 好所在。毋閣正爿頂懸彼个大 烏點 是啥物？彼是另外一粒木星衛星，木衛一 Io ê 烏影：。航海家 1 號發現講，木衛一 Io 有足濟火山活動，所以咱 tī 伊頂懸揣袂著 隕石坑。航海家 1 號 tī 1979 年 ê 時陣飛過木星，翕著 16 張相片。這馬有人 kā 這寡觀測資料重新處理，合併做 這張影像。45 冬前 ê 8 月，航海家 1 號 ùi 地球發射，開始 tī 咱 太陽系 內底進行 上偉大 ê 探險 ，一直到今。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220717/ <br />影像來源：NASA, Voyager 1, JPL, Caltech <br />資料處理 kah 許可:_ Alexis Tranchandon / Solaris <br />音樂：高小糕 GaoXiaoGao <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220717.html</p> <br /> <br/>Powered by <a href="https://firstory.me">Firstory Hosting</a>