528. Ùi BepiColombo 太空船 面頭前行過 ê 水星 ft. 阿錕 (20220628)

<p>這是月球 ê 佗一部份？攏毋是呢！因為這是 水星。水星表面是 較老 ê 地表，kah 咱月球 仝款，攏去予大粒隕石 摃甲糜糜卯卯。水星干焦比咱 月球 較大淡薄仔，毋閣伊比 太陽系 內底所有 衛星 ê 密度攏較懸，質量嘛較大。這是因為伊主要 ê 成份是 鐵。實際上，太陽系內底嘛干焦地球 ê 密度比水星 ê 較懸。因為 水星 自轉週期 ê 3 倍拄仔好是公轉週期 ê 2 倍，而且水星 ê 長株圓軌道 嘛較長，所以咱若是去到水星做客，就會當看著 日頭 peh 起來了後，佇天頂停咧，閣倒轉去伊 peh 起來彼爿地平線，閣停咧，閣隨 ùi 另外一爿地平線落去。Ùi 地球來看，水星離太陽遮爾倚，所以咱干焦有法度佇 日落了後、抑是日出進前 短短仔 ê 時間內，看著伊。這張相片 是頂禮拜 歐洲 ESA kah 日本 JAXA 合作 ê BepiColombo 太空船 飛過 ê 時陣翕--ê。太空船 kā 能量釋放出去，準備欲 ùi 2025 年開始 踅太陽系上內底 ê 行星 行。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220628/ <br />影像：ESA, JAXA, BepiColombo, MTM <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220628.html</p> <br /> <br/>Powered by <a href="https://firstory.me">Firstory Hosting</a>