524. 太陽西爿邊界 ê 太陽絲爆發 ft. 阿錕 (20220624)

<p>太陽絲 是 tī 太陽表面 ê 太陽活跳區 頂懸，循環磁場發出 ê 超大型、超高溫 ê 電漿流。Kah 太陽盤比起來，太陽絲看起來烏烏，這是因為伊 ê 溫度較低，所以看起來比 太陽光球層 較暗。這寡浮 tī 太陽邊界頂懸 ê 結構，若是背景是烏暗 ê 太空，in 看起來就會較光，這个時陣咱就 kā 叫做 日珥。太陽絲爆發包括 ùi 太陽盤頭前行過--ê，kah 湠到太陽邊界外口 ê 磁化電漿流。Hα 波段 ê 太陽特寫是 tī 6 月 22 翕--ê。太陽活跳區 AR3038 就 tī 正爿，欲倚 太陽西爿邊界 遐。太陽活跳區 AR3038 是綴太陽踅到邊界 ê 時陣才看會著--ê。過去 tī 太陽活跳區頂懸遮爾大 ê 太陽絲，這馬變做是日珥 ê 一部份。毋知你敢知影太陽活跳區 AR3038 ê 太陽絲爆發是有偌大？相片正爿頂懸角仔遐，有囥一粒地球做比例，予你做參考。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220624/ <br />影像：Martin Wise <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220624.html</p> <br /> <br/>Powered by <a href="https://firstory.me">Firstory Hosting</a>