431. 瑞典樹林仔天頂 ê 海翁極光 ft. 阿錕 (20220322)

<p>天頂彼是啥物？是極光啦！太陽 tī 這個月初 ê 時陣，發生大型 ê 日冕物質噴出事件 (CME)，kā 一陣 高速運動 ê 電子、質子、kah 離子擲 tùi 地球來。一部份 ê 粒子挵著地球 ê 磁層，予伊產生一个閬縫，才 tī 北半球一寡懸緯度 ê 所在產生 壯麗 ê 極光。這張相片 主要是 tī 瑞典 ê 一个樹林仔 翕 Östersund 市 ê 景色 kah 天頂 ê 極光冕。這款 爍咧爍咧 ê 青光 其實是大氣 酸素分子 重組 發--出 ê 光。對一寡人來講，這看--起來敢若是大隻 海翁。毋閣嘛真歡迎你 kā 逐家講，你感覺這看--起來親像是啥物。太陽 tī 進前幾若年實在是 恬-chih-chih，有小可仔怪怪。這个恬靜 ê 現象已經煞矣。太陽 ê 磁週期是 11 年 一个循環。咱 ê 太陽這馬已經沓沓仔來到磁週期 ê 太陽極大期 矣。像這款 遮爾媠 ê 極光，紲落來會一直看會著。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220322/ <br />影像：Göran Strand <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220322.html</p> <br /> <br/>Powered by <a href="https://firstory.me">Firstory Hosting</a>