417. 虹 leh 微微仔笑 ft. 阿錕 (20220311)

<p>你有想欲看 虹 ê 笑容無？若是 tī 日頭較低 ê 時陣，向「天頂 (頭頂)」看去，可能 to̍h 有機會看著。這張相片是 2 月 24 tī Sicily 島 Ragusa 市 ê 棕樹 頭頂翕著 ê。相片內底這款 冰暈 嘛叫做 環天頂弧。像有這款色水 ê 光弧 定定去 hŏng 叫做是虹 ê 笑容，因為 光弧 ê 方向 kah 色水 ê 順序攏是顛倒反 ê。一般咱看著 ê 虹，會綴 tī 西北雨後壁出現，伊 ê 光弧是 彎對地平線去。毋閣 若是看著 環天頂弧，「天頂」to̍h 是 tī 光弧 ê 中心矣，紅色是 tī 上外口彼輾。真正 ê 虹是水滴 kā 太陽光 ê 光路屈折去，產生彩色光 ê 光譜。毋閣 環天頂弧 是 光線行過 扁扁仔 ê 六角形冰晶 了後，屈折 kah 反射 ê 產物。這 to̍h kah 冰晶會 tī 較懸較薄 ê 雲內底，產生 幻日 ê 現象仝款。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220311/ <br />影像：Marcella Giulia Pace <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220311.html</p> <br /> <br/>Powered by <a href="https://firstory.me">Firstory Hosting</a>