381. 共生變星 水瓶座 R 星 ft. 阿錕 (20220205)

<p>變星 水瓶座 R 星 實際上是一組雙星系統，這兩粒 看起來是有密切 ê 共生關係。這張是太空望遠鏡翕 ê 光學 kah X-光 ê 組合影像，中央這粒離咱有 710 光年遠。這个趣味 ê 系統有一粒較冷 ê 紅巨星 kah 一粒較高溫較實密 ê 白矮星，攏踅 in 共同 ê 質量中心 leh 行。你若是用雙筒望遠鏡來 kā 看，to̍h 會發現 水瓶座 R 星 tī 一冬左右 ê 時間 沓沓仔改變伊 ê 光度。這个雙星系統 ê 可見光主要是 ùi 紅巨星來 ê。這是一粒 Mira-型 ê 長週期 變星。包 tī 較冷彼粒巨星外口 ê 物質，會去予重力搝到較細粒、較實密彼粒白矮星。落尾會 引起 熱核爆炸，kā 物質噴到太空中。天文學家 tī 過去幾若十年捌看過這款爆發。相片內底紅色 kah 藍色 ê 就是哈伯太空望遠鏡翕著 ê。這款美麗 ê 結構 差不多有 1 光年闊，這是一个較老 ê 爆發 ê 觀測證據。這个觀測資料是 ùi Chandra X-光 天文台（茄仔色）來 ê。內底是白矮星 ê 噴流 kah 伊邊仔 ê 物質相挵，產生 ê X-光 衝擊波。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20220205/ <br />影像：X-光：NASA/CXC/SAO/R. Montez et al.; 光學：資料來源：NASA/ESA/STScI, 資料處理：Judy Schmidt (CC BY-NC-SA) <br />音樂：P!SCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap220205.html <br /> <br/>Powered by <a href="https://firstory.me">Firstory Hosting</a></p>