306. 有藍色布邊 ê 血月 ft. 阿錕 (20211201)

<p>是啥物物件 tī 月食 ê 邊界產生這个藍色 ê 布邊？這个藍色布邊是真的，毋閣真歹看著。這是頂禮拜月食 ê 時陣，tī 中國 鹽城 用 HDR 技術翕著 ê 相片。這已經用數位處理 ê 方式 kā 月娘 ê 光度調整過矣，按呢 色彩 會較明顯。正爿下跤 ê 殕色 是 月娘 本底 ê 色，是直接反射太陽光 ê 色。倒爿面頂 ê 月娘無直接去予太陽光照著，因為去予 地球 ê 烏影 閘著 矣。毋閣太陽光迵過 地球厚厚 ê 大氣層 了後，雖然有較暗，嘛是有照著月娘。按呢去照著 ê 月娘是紅色 ê，咱 kā 叫做 血月。這 kah tī 地球看著 ê 紅色日落是仝款 ê 原因。因為空氣會 kā 大部份 ê 藍光 散射，賰 ê 看著 ê 就是紅色 ê。這个無四常 ê 藍色布邊 是別款原因。這个藍色是太陽光迵過高層 ê 地球大氣，遮 ê 紅光 去予臭氧吸收去矣，煞賰 藍光。明仔載有 日全食，毋閣真不幸，干焦 tī 地球南極 附近才 看有。 <br /> <br />——— <br />這是 NASA Astronomy Picture of the Day ê 台語文 podcast <br />原文版：https://apod.nasa.gov/ <br />台文版：https://apod.tw/ <br /> <br />今仔日 ê 文章： <br />https://apod.tw/daily/20211201/ <br />影像：Angel Yu <br />音樂：PiSCO - 鼎鼎 <br />聲優：阿錕 <br />翻譯：An-Li Tsai (NCU) <br />原文：https://apod.nasa.gov/apod/ap211201.html <br /> <br/>Powered by <a href="https://firstory.me">Firstory Hosting</a></p>